ВТУ – Бугарија 2019 – со деканот на факултет по психологија Проф. Д-р Даниела Тасевска

Почитувани,

Овој прашалник има за цел да ги покаже социјалното заемодејствие и психологијата на насмевката и да овозможи да направи социјално-психолошка анализа на моќта на насмевката – тема на научен труд со која се занимавам повеќе години. Тоа би требало да биде солидна основа за креирање и дизајнирање на насмевката, при што визиите и надежите или комплексите и фрустрациите на пациентот, искажани во овој прашалник, ќе бидат анализирани, простудирани и ефектуирани преку модерните техники за дизајнирање на насмевката во естетската стоматологија.

Во денешно време сме бомбардирани од информации кои доаѓаат од разни страни и мора јасно да се направи разлика меѓу тоа што претставува доктор на стоматологија, а што естетски стоматолог, бидејќи не е сеедно кој ќе ја креира Вашата насмевка. Насмевката не е збир само на протетски параметри кои, разбирливо, се потребни при анализата и изработката, туку опфаќа и други полиња, како: уметност, филозофија, антропологија, социологија, а посебно психологија која, преку насмевката како најдоминантна форма на лицева експресија, прави или да ја искажете Вашата душа или да ја прикриете. Исто така, социјалната интеракција преку лицеви експресии или гестикулации отсекогаш била форма за меѓучовечка комуникација. Оттука, насмевката е Вашиот белег и билет за иднината. Колку повеќе сте доминантни со насмевката, толку повеќе ќе бидете среќни и успешни.

Би Ве замолил да одвоите малку време и да го пополните прашалникот. Направен е во групи и опфаќа прашања од стоматолошка самодоверба, социјално влијание, психолошко влијание и естетска загриженост. Вашите лични податоци се заштитени и нема да бидат јавно објавени, а одговорите ќе бидат употребени како основа за анализа и предмет на истражување за мојата докторска дисертација.

Со почит и благодарност,
Прим. д-р Томе Тасевски / MBA